Intuorn l’on 1040 es il chastè gnü construi dals signurs da Tarasp, oriunts dal lai da Como. L’on 1239 es la fortezza ida als cunts dal Tirol. Dal 1464 es dvantà il chastè ün cuntadi austriac. Aint il 16avel tschientiner es gnü l’implant amplifichà e dvantà fortezza da cunfin. Dal 1803, cun Napoleon, es il chastè da Tarasp, dvantà part dalla Republica Helvetica, sco üna dallas ultimas enclavas svizzras. Aint ils prossems decennis ha müdà il chastè püssas jadas man e ha suffert boccer.
La stà dal 1900 l’industrial da Dresden, Dr. Karl August Lingner, ha fat la cura a Vulpera. L’inventur dad Odol ha lura deziss da cumprar la fortezza falombra. Per renovar il chastè ha’l ramassà stüvas e mobiglia or da chasas patrizias dal Grischun, dal Tirol, e dalla Germania. Dal 1916, ha Lingner installà aint illa anteriura chombra dad armas ün orgel Jehmlich da Dresden chi es hoz il plü grond orgel privat da l’Europa.
Listess on es mort Lingner inaspettadamaing. El veva fat sü il chastè al ultim rai dalla Saxonia, Friedrich August III. Cun quai cha’l nun ha acceptà es i via il chastè al grond duca Ernst Ludwig von Hessen. La famiglia von Hessen es statta possesura fin als 30 marz 2016 curcha Not Vital ha cumprà il chastè da Tarasp.
Hoz cuntegna Tarasp üna collecziun dad art antica, moderna e contemporanea. Il Parkin, ün parc da sculpturas a Sent e la chasa Planta ad Ardez fan er part dalla fundaziun da Not Vital.