Vers la prüma mittà dal 20avel tschientiner ha fabrichà l’architect Nikolaus Hartmann il parkin pel randulin Lüzza (Luzio) Crastan.
Cur chi’d es rot ora la segonda guerra mundiala ha’l stuvü abandunar seis sömmi da far sa villa in Engiadina. Il parkin cun tots sas sendas, 1 bogn e la terrassa per la chasa sun gnüds realisads, ma ingüna chasa.
Il park es lura creschü aint. Da quai chi d’eira üna jà nu’s vezzaiva pü bler e las sendas nu d’eran pü transiblas.
In mai dal 1998 ha Not Vital cumprà il park dad Otto Augustin & til ha transfuormà in üna fundaziun cun nom Not dal mot. Cun seis frar Duri ha’l cumanzà a til metter darchè ad ir.
I han taglià jò blera bos-cha, fat liber sendas, fat sü mürs, implantà fluors e miss ad ir darchè il bogn cuernond quel cun atschal. Culs ons sun gnüdas installadas sculpturas ed installaziuns architectonicas.
Ossa as traversa la val sün ches dad asens o sün üna punt invisibla. Id es er gnü fat üna chasa ed üna s-chala, tot da vaider da Murano. Ün’otra chasa svanischa aint illa terra schmachond be sül pom.
Cul parkin es nat SCARCH – üna gruppa dad ovras ingiò cha Not Vital unischa sculptura ed architectura ch’el ha pü tard realisà sün mincha continent.
Mincha venderdì da la mittà gün fin vers il cumanzamaint dad october es il parkin avert al public. Per visitar esa da contactar il büro da trafic dal cumün da Sent (Scuol).